फलटण, दि. २२ सप्टेंबर: रोबोटिक्स, आर्टिफिशियल इंटेलिजन्स (AI) आणि विज्ञान-तंत्रज्ञान (STEM) क्षेत्रातील अत्यंत प्रतिष्ठित मानल्या जाणाऱ्या 'रोबोटेक्स इंडिया नॅशनल चॅम्पियनशिप'मध्ये फलटण एज्युकेशन सोसायटीच्या श्रीमंत शिवाजीराजे इंग्लिश मीडियम स्कूल, जाधववाडीच्या विद्यार्थ्यांनी चमकदार कामगिरी करत तालुक्याच्या शिरपेचात मानाचा तुरा खोवला आहे.प्रशालेचे विद्यार्थी देवेंद्र महेश सुतार आणि शिवराज शेंडे या जोडीने 'फोक रेस - इंटरमीडिएट' या प्रकारात राष्ट्रीय स्तरावर द्वितीय क्रमांक पटकावला आहे.पुण्यातील एमआयटी, लोणी काळभोर येथे दि. २० आणि २१ सप्टेंबर रोजी या राष्ट्रीय स्पर्धेचे आयोजन करण्यात आले होते. देशभरातील २००० पेक्षा जास्त संघांनी आणि ५००० हून अधिक विद्यार्थ्यांनी सहभाग नोंदवलेल्या या विशाल स्पर्धेत फलटणच्या या दोन विद्यार्थ्यांनी आपले कर्तृत्व सिद्ध केले.या विद्यार्थ्यांच्या उत्तुंग यशाबद्दल फलटण एज्युकेशन सोसायटीच्या सर्व पदाधिकाऱ्यांनी त्यांचे अभिनंदन केले आहे. सोसायटीचे अध्यक्ष व विधानपरिषद सदस्य श्रीमंत रामराजे नाईक निंबाळकर, चेअरमन श्रीमंत रघुनाथराजे नाईक निंबाळकर, सचिव श्रीमंत संजीवराजे नाईक निंबाळकर आणि प्रशासकीय अधिकारी अरविंद निकम यांनी विजेत्यांचे कौतुक केले.तसेच, विद्यार्थ्यांना योग्य मार्गदर्शन करणाऱ्या मुख्याध्यापिका अंजुम शेख, रोबोटिक्स शिक्षक आकाश साळुंखे आणि अनिकेत माने यांच्या अथक प्रयत्नांची आणि योगदानाचीही प्रशंसा करण्यात आली.विद्यार्थ्यांनी मिळवलेल्या या यशाने फलटण एज्युकेशन सोसायटीमध्ये आणि संपूर्ण फलटण तालुक्यात आनंदाचे आणि उत्साहाचे वातावरण निर्माण झाले आहे.