फलटण (प्रतिनिधी) :

जागतिक महिला दिनाचे औचित्य साधून, दुग्ध व्यवसायाद्वारे ग्रामीण महिलांना आर्थिकदृष्ट्या सक्षम करणाऱ्या फलटण येथील **'गोविंद फौंडेशन'**ला नेदरलँडचा प्रतिष्ठित 'PUM इम्पॅक्ट अवॉर्ड २०२५' देऊन गौरविण्यात आले. नवी दिल्ली येथील नेदरलँडच्या राजदूत सुश्री एच. ई. मारिसा जेरार्ड्स यांच्या निवासस्थानी हा सोहळा नुकताच पार पडला.

जागतिक स्तरावर उमटला फलटणचा ठसा

डिसेंबर २०२५ मध्ये नेदरलँड्स येथे राणी मॅक्सिमा यांच्या उपस्थितीत या पुरस्काराची घोषणा करण्यात आली होती. जगभरातील ६ विजेत्यांमध्ये गोविंद फौंडेशनने स्थान मिळवून भारताचा मान उंचावला आहे. नवी दिल्लीतील कार्यक्रमात गोविंद मिल्कचे अध्यक्ष श्रीमंत संजीवराजे नाईक निंबाळकर आणि संचालिका श्रीमंत सौ. शिवांजलीराजे नाईक निंबाळकर यांनी हा सन्मान स्वीकारला.

प्रशासकीय आणि राजनैतिक मान्यवरांची उपस्थिती

यावेळी नेदरलँड्स दूतावासातील कृषी सल्लागार मॅरियन व्हॅन शाईक, गोविंद मिल्कचे सीईओ धर्मेंद्र भल्ला, महाव्यवस्थापक डॉ. शांताराम गायकवाड, श्रीमंत अजयसिंह नाईक निंबाळकर, PUM भारत प्रतिनिधी डॉ. तरन्नुम कादरभाई आणि पुनीत रमण उपस्थित होते.

"गोविंद फौंडेशनचे कार्य प्रेरणादायी आहे. १२८ लिटरपासून सुरू झालेला प्रवास आज ७ लाख लिटरपर्यंत पोहोचला आहे. २२ हजारांहून अधिक महिलांना आर्थिक स्वातंत्र्य मिळवून देणे हे उद्योजकतेचे उत्तम उदाहरण आहे."

— सुश्री एच. ई. मारिसा जेरार्ड्स (नेदरलँडच्या राजदूत)

महिलांच्या कष्टाला तंत्रज्ञानाची जोड

पुरस्काराला उत्तर देताना श्रीमंत संजीवराजे म्हणाले की, "आमच्या यशाचा कणा हजारो महिला दुग्ध उत्पादक आहेत. १० लाख लिटर संकलनाचे आमचे पुढील ध्येय असून हे यश महिलांच्या समर्पणामुळेच शक्य झाले आहे."

श्रीमंत सौ. शिवांजलीराजे यांनी स्पष्ट केले की, फौंडेशनमार्फत महिलांचे श्रम कमी करण्यासाठी:

मुक्त संचार गोठा संकल्पना राबवण्यात आली.

मुरघास आणि उत्तम वंशावळ निर्मितीसाठी तांत्रिक मदत दिली.

महिलांना पंजाब, कर्नाटकसारख्या राज्यांत अभ्यास दौऱ्यावर पाठवले.

आज अनेक महिला २ गाईंपासून ५० गाईंपर्यंत पोहोचल्या असून ट्रॅक्टर चालवण्यासारखी कठीण कामेही स्वतः करत आहेत.

PUM तज्ज्ञांचे मार्गदर्शन

PUM प्रतिनिधी डॉ. तरन्नुम कादरभाई यांनी सांगितले की, १० गावांतील १०० महिलांना 'मास्टर ट्रेनर' म्हणून प्रशिक्षित करण्यात आले आहे, ज्या आता इतर महिलांना मार्गदर्शन करत आहेत. शाश्वत विकास आणि ग्रामीण उपजीविका मजबूत करण्यात गोविंद फौंडेशनने आदर्श निर्माण केला आहे.