सातारा | प्रतिनिधी:

कृषी विभागाने शेतकऱ्यांना विविध योजनांचा लाभ देताना शासनाने निश्चित केलेल्या निकषांचे सर्व तालुक्यांमध्ये समान पद्धतीने पालन करणे बंधनकारक आहे. कोणत्याही पात्र शेतकऱ्याला लाभापासून वंचित ठेवू नये, असे स्पष्ट निर्देश अप्पर जिल्हाधिकारी मल्लिकार्जुन माने यांनी दिले आहेत.

जिल्हाधिकारी कार्यालयात आयोजित जिल्हा ग्राहक संरक्षण परिषदेच्या बैठकीत ते बोलत होते. यावेळी जिल्हा पुरवठा अधिकारी वैशाली राजमाने यांच्यासह विविध विभागांचे अधिकारी आणि ग्राहक संरक्षण परिषदेचे अशासकीय सदस्य उपस्थित होते.

बैठकीतील महत्त्वाचे मुद्दे आणि निर्देश:

शेतकऱ्यांचे हित: कृषी योजनांची अंमलबजावणी करताना पारदर्शकता ठेवावी आणि निकषांमध्ये सुसूत्रता आणावी.

वीज वितरण यंत्रणा: अनेक शेतांमध्ये विद्युत तारा जमिनीलगत आल्या आहेत, ज्यामुळे अपघाताची भीती आहे. महावितरणने या तारा तातडीने उंच करण्याचे काम हाती घ्यावे.

शहरातील वाहतूक: सातारा शहरातील विस्कळीत वाहतूक सुरळीत करण्यासाठी बंद असलेली सिग्नल यंत्रणा तात्काळ सुरू करावी.

अतिक्रमण हटाव: गोडोली ते मोळाचा ओढा या मुख्य रस्त्यावरील अतिक्रमणे काढून रस्ता मोकळा करावा, जेणेकरून वाहतूक कोंडी सुटेल.

अहवाल सादर करण्याचे आदेश

या बैठकीत अशासकीय सदस्यांनी विविध स्थानिक समस्यांकडे प्रशासनाचे लक्ष वेधले. या समस्यांवर संबंधित विभागांनी तातडीने कार्यवाही करून त्याचा सविस्तर अहवाल सादर करावा, असे आदेशही श्री. माने यांनी यावेळी दिले.