फलटण (प्रतिनिधी):

तालुक्यातील आरडगाव येथे भीम गौरव तरुण मंडळ, माता रमाई महिला मंडळ आणि पंचशील बुद्ध विहार यांच्या संयुक्त विद्यमाने तथागत भगवान गौतम बुद्ध आणि डॉ. बाबासाहेब आंबेडकर यांची जयंती मोठ्या उत्साहात साजरी करण्यात आली. या निमित्ताने विविध सामाजिक आणि सांस्कृतिक उपक्रमांचे आयोजन करण्यात आले होते.

महिलांसाठी 'होम मिनिस्टर'चा थरार

जयंतीचे खास आकर्षण असलेल्या माता रमाई महिला मंडळाच्या 'होम मिनिस्टर' कार्यक्रमात महिलांनी उत्स्फूर्त सहभाग घेतला. या स्पर्धेत:

प्रथम क्रमांक: सौ. मधुमती प्रमोद काकडे (पैठणी व सन्मानचिन्ह)

द्वितीय क्रमांक: सौ. वर्षा गणेश कदम

तृतीय क्रमांक: सौ. अंजली भोसले

धार्मिक व शैक्षणिक उपक्रम

भन्ते धम्मानंद (फलटण) यांच्या मार्गदर्शनाखाली श्रामणेर शिबिरातील भिक्खू संघाने बुद्ध विहारला भेट देऊन भोजनदान स्वीकारले. तसेच, २ मे रोजी मुलांच्या सुप्त गुणांना वाव देण्यासाठी रांगोळी, चित्रकला व निबंध स्पर्धा पार पडल्या. यामध्ये सानिका काकडे, देवयानी काकडे, श्रुती काकडे यांच्यासह ४८ स्पर्धकांनी सहभाग नोंदवला.

भव्य मिरवणूक आणि मान्यवरांची उपस्थिती

सायंकाळी गावातून ढोल-ताशांच्या गजरात भगवान बुद्ध आणि डॉ. बाबासाहेब आंबेडकर यांची भव्य मिरवणूक काढण्यात आली. या कार्यक्रमास आरपीआय नेते विजय येवले, संजय निकाळजे, राजू मारुडा, प्रवीण शेळके, अमोल गायकवाड यांसह अनेक मान्यवर उपस्थित होते.

भीम गौरव तरुण मंडळाचे अध्यक्ष प्रमोद काकडे यांच्या मार्गदर्शनाखाली सर्व पदाधिकारी आणि कार्यकर्त्यांनी कार्यक्रम यशस्वी करण्यासाठी विशेष परिश्रम घेतले.