सातारा | प्रतिनिधी:

जिल्हा परिषद व पंचायत समितीच्या निवडणुका पारदर्शक, भयमुक्त आणि निष्पक्ष वातावरणात पार पाडण्यासाठी सर्व विभागांनी समन्वयाने काम करावे. आचारसंहितेच्या काळात कोणत्याही शासकीय अधिकारी किंवा कर्मचाऱ्याची पक्षपाती वर्तणूक खपवून घेतली जाणार नाही, असा कडक इशारा जिल्हाधिकारी संतोष पाटील यांनी दिला आहे.

जिल्हाधिकारी कार्यालयातील नियोजन भवन येथे आयोजित निवडणूक तयारी, आदर्श आचारसंहिता आणि कायदा व सुव्यवस्थेच्या आढावा बैठकीत ते बोलत होते. यावेळी मुख्य कार्यकारी अधिकारी याशनी नागराजन, पोलीस अधीक्षक तुषार दोशी यांच्यासह वरिष्ठ अधिकारी उपस्थित होते.

बैठकीतील महत्त्वाचे मुद्दे आणि निर्देश:

चुका टाळा, कारण 'डोळ्यात तेल घालून' लक्ष: जिल्हाधिकारी म्हणाले की, सध्या प्रत्येकाच्या हातात कॅमेरा (मोबाईल) असल्याने कोणतीही छोटी चूकही तत्काळ लोकांपर्यंत पोहोचते. त्यामुळे कामकाज करताना अत्यंत सावधानता बाळगावी.

एक खिडकी योजना: उमेदवारांना विविध परवानग्या मिळवण्यासाठी 'एक खिडकी योजना' तातडीने सुरू करण्याचे आदेश देण्यात आले आहेत.

राजकीय साहित्यावर कारवाई: जिल्हा परिषदेच्या इमारतींवरील राजकीय नेत्यांचे फोटो, बॅनर आणि फलक त्वरित हटवून त्याचे ऑडिट सादर करण्याच्या सूचना बांधकाम विभागाला दिल्या आहेत.

वाहने आणि शस्त्रे जमा करणे: राजकीय पदाधिकाऱ्यांकडील शासकीय वाहने तात्काळ जमा करावीत. तसेच, कायदा व सुव्यवस्था राखण्यासाठी परवानाधारक शस्त्रे जमा करून घेण्याचे निर्देश पोलीस विभागाला देण्यात आले आहेत.

उमेदवारी अर्ज प्रक्रिया: नामनिर्देशनपत्रे दाखल करताना होणारी गर्दी आणि वाद टाळण्यासाठी प्रशस्त जागा निवडून संपूर्ण प्रक्रियेचे चित्रीकरण करण्याचे आदेश देण्यात आले.

पोलीस प्रशासनाची भूमिका:

पोलीस अधीक्षक तुषार दोशी यांनी सांगितले की, निवडणूक शांततेत पार पाडण्यासाठी आवश्यक पोलीस बळाची मागणी करण्यात आली आहे. भरारी पथके (Flying Squads) आणि स्थिर पथकांसाठी पुरेसे पोलीस व होमगार्ड पुरवले जातील. तसेच तडीपारीसारखे प्रतिबंधात्मक आदेश तातडीने काढले जातील.

या बैठकीला उपजिल्हाधिकारी विक्रांत चव्हाण, निवासी उपजिल्हाधिकारी नागेश पाटील, तसेच सर्व प्रांताधिकारी, तहसीलदार आणि गटविकास अधिकारी उपस्थित होते.