फलटण : ग्रामीण आणि शहरी भागातील उदयोन्मुख क्रिकेटपटूंना हक्काचे व्यासपीठ मिळवून देण्यासाठी फलटण सज्ज झाले आहे. फलटण एज्युकेशन सोसायटी आणि क्रिकेट अकॅडमी ऑफ चॅम्पियन्स यांच्या संयुक्त विद्यमाने “गोविंद चषक” या भव्य लेदर बॉल क्रिकेट स्पर्धेचे आयोजन करण्यात आले आहे. यंदा या स्पर्धेचे तिसरे यशस्वी वर्ष (पर्व) असून, दि. ३ मे ते २० मे २०२६ या कालावधीत हा क्रिकेटचा कुंभमेळा रंगणार आहे.

सातारा जिल्ह्यातील पहिलाच आगळावेगळा उपक्रम

विशेष म्हणजे, सातारा जिल्ह्यात १२ वर्षांखालील (U-12) गटासाठी लेदर बॉल स्पर्धा आयोजित करणारा हा पहिलाच उपक्रम ठरला आहे. यासोबतच १४ वर्षांखालील (U-14) गटातील खेळाडूंनाही आपली चमक दाखवण्याची संधी मिळणार आहे. फलटण येथील श्रीमंत शिवाजीराजे क्रीडा संकुल, शिंगणापूर रोड येथील मैदानावर हे सामने खेळवले जातील.

स्पर्धेचे स्वरूप आणि गटवारी (Draws)

श्रीमंत संजीवराजे नाईक निंबाळकर यांच्या शुभहस्ते स्पर्धेची ड्रॉ प्रक्रिया नुकतीच पार पडली. राज्यभरातील नामांकित अकॅडमींनी या स्पर्धेत सहभाग नोंदवला असून गटांची विभागणी खालीलप्रमाणे आहे:

१२ वर्षांखालील गट (U-12):

गट 'अ' : क्रिकेट अकॅडमी ऑफ चॅम्पियन्स ‘बी’, अजित वाडेकर क्रिकेट अकॅडमी, क्रिकेट अकॅडमी ऑफ चॅम्पियन्स ‘ए’, नेरळकर क्रिकेट अकॅडमी (छत्रपती संभाजीनगर).

गट 'ब' : प्रोफेशनल क्रिकेट अकॅडमी (सातारा), क्रिकेट अकॅडमी ऑफ चॅम्पियन्स ‘सी’, राजस्थान रॉयल्स क्रिकेट अकॅडमी, बारामती स्मॅशर्स.

१४ वर्षांखालील गट (U-14):

गट 'अ' : सारा क्रिकेट अकॅडमी, क्रिकेट अकॅडमी ऑफ चॅम्पियन्स ‘सी’, मिलिंद गुंजाळ स्पोर्ट्स अकॅडमी, बारामती स्मॅशर्स, राजस्थान रॉयल्स क्रिकेट अकॅडमी.

गट 'ब' : रायझिंग क्रिकेट अकॅडमी, नेरळकर क्रिकेट अकॅडमी, क्रिकेट अकॅडमी ऑफ चॅम्पियन्स ‘ए’ व ‘बी’, प्रोफेशनल क्रिकेट अकॅडमी (सातारा).

मान्यवरांची उपस्थिती

ड्रॉ प्रक्रियेवेळी फलटण पंचायत समितीचे उपसभापती अमोल सस्ते, श्रीराम सहकारी साखर कारखान्याचे संचालक महादेवराव माने, अरविंद निकम (सर), दशरथराव नाईक निंबाळकर, अशोक गाडगीळ, आरियन गाडगीळ आणि अवि कांबळे यांसह अनेक मान्यवर उपस्थित होते.

"या स्पर्धेमुळे लहान वयातील खेळाडूंना दर्जेदार अनुभव मिळणार असून, भविष्यातील आंतरराष्ट्रीय दर्जाचे खेळाडू घडवण्यासाठी हा उपक्रम मैलाचा दगड ठरेल," असा विश्वास आयोजकांनी व्यक्त केला आहे.

क्रिकेटप्रेमींसाठी मे महिन्याची ही सुट्टी क्रिकेटच्या मनोरंजनाने आणि चुरशीच्या सामन्यांनी गाजणार, हे निश्चित!